Friday, 10 July 2020 | Lajme: 0

Qielli bëhet portokalli në Australi, probleme shëndetësore

Një stuhi gjigante rëre është përplasur mbi komunitetet në Australinë juglindore, duke e bërë qiellin ngjyrë portokalli dhe duke rritur shqetësimet për cilësinë e ajrit.

Autoritetet lëshuan një paralajmërim për shëndetin publik për Sidnejin, ndërsa masa e rërës 500 km e gjerë arriti qytetin dhe shkaktoi vonesa në fluturime.

Në shumë rajone të tjera të New South Wales, shikueshmëria është e mangët. Autoritetet thanë se stuhia ishte shkaktuar nga erëra të forta, që merrnin me vete rërën nga tokat e thara.

Problemi është përshkallëzuar si pasojë e thatësirës që ka prekur të gjithë shtetin e New South Wales që nga gushti.
Skuadrat e emergjencave thanë se dhjetëra njerëz kanë raportuar probleme me frymëmarrjen, apo me astmën, por numri i të prekurve nuk është menjëherë i qartë. Në Sidneji, rëra errësoi qiellin dhe përkeqësoi cilësinë e ajrit.

Zyrtarët e shëndetësisë u kërkuan banorëve të qëndrojnë në shtëpi, veçanërisht fëmijët, të moshuarit dhe ata me probleme në frymëmarrje.

“Më shumë rrezikohen personat me sëmundje zemre dhe mushkërie. Ndaj, ata këshillohen të qëndrojnë në ambiente të mbyllura”, tha Richard Broome, drejtor i shëndetit ambiental.
Stuhia e rërës në Sidneji riktheu në kujtesë një tjetër ngjarje, edhe më intensive, në vitit 2009. Asokohe, stuhia e rërës preku me qindra persona, duke u shkaktuar probleme në frymëmarrje dhe la në tokë me qindra fluturime.